「童年」
唔知大家會唔會諗返自己細個嘅時候到底我哋嘅童年生活係點樣過嘅呢？有可能你話我老餅，但係今日小朋友嘅童年同我哋嘅童年真係好唔同。以前小學返學係半日制，上下晝班。當然返下晝班好多時放學都係直接返屋企食飯做功課，要朝頭早先可以有得玩。而返上晝班就可以快快趣做完功課，仲有可能可以係屋苑樓下同其他細路仔玩。但係而家就真係好難見到咁嘅情況。
「成長」
雖然自己個仔仲未識行識走，但係有時會諗佢嘅童年會係點？日日放學淨係學呢樣嗰樣？為嘅係配合現今香港嘅教育體制？我好記得好多嘢都係屋苑樓下同其他小朋友玩嘅時候學，包括學識咗跴單車，羽毛球同乒乓波。而係某個暑假，因為日日去泳池游水，最終由泳池嘅救生員教識我游水。好多嘢都係因為自己有興趣玩，所以自己主動去學。而有時為都會懷念細個嘅時候落樓下同一班唔識嘅小朋友玩。
「影響」
當然依家你可以話社會富裕咗，屋企會有工人處理好多嘢。雖然唔可以話自己細個已經好獨立，但係最少好多嘢諗返轉頭係現今小朋友缺乏咗。而缺少咗咗啲乜？就係童真！依家去公園玩竟然係一件好似好奢侈同浪費時間嘅事，但係有無諗過其實有時學習唔一定要去上堂。去發掘小朋友興趣同發展佢哋嘅潛能其實有好多方法。遺憾嘅係香港嘅填鴨式嘅教育制度，導致怪獸家長嘅出現，引致小朋友失去寶貴嘅童年，影響日後嘅發展！
