「概況」
幾經辛苦先執好咗香港島啲選區資料，最麻煩嘅就係候選人嘅黨派。首先俾大家一啲基本資料，選區數目有80個，參選人有187個，平均2.3個人競爭1個議席。今次投票率係39.22%，合共239,341張選票。建制派票數比民主派多12.6%，而選票比例係1.28：1。而平均每個選區重奪議席嘅話，民主派平均需要713標。民主派係香港區有25%議席，而建制派嗰75%議席入面有25%係自動當選！
「分析」
『中西區』
1：好明顯大部份嘅選民偏向建制派，民主派係港島區落選差距最大。
2：中西區係港島區投票率最高，不過選民數量係四個區排第三。
3：要特別注意嘅係有三個選區；正街，寶翠，西環。落選差距係 6% 左右。
4：堅摩選區有兩個民主派嘅候選人落選，但係佢哋加埋嘅票數足以勝出。
5：民主派要係中西區佔大多數其實要花好多功夫，尤其係山頂，西營盤，石塘咀。
『灣仔區』
1：一個完全建制派主導嘅選區，但係唔係無希望。
2：民主派要分一杯羹佢實係得，因為平均候選人嘅落選差距係港島區最低（建制 763：609 民主）。
3：不過要注意嘅係每個落選嘅選區嘅差距最小都有成 30% 嘅差別。
4：民主派應該派人去同兩個自動當選嘅建制派選區出戰。
5：整體民主派要加把勁先可以收復灣仔區。畢竟係傳統老區。
『東區』
1：全香港第三大嘅選區，不過投票率係港島最低。
2：有四分一議席係自動當選，而且全部係建制派議席。
3：明顯中產選區傾向民主派，有無合適人選變成主要因素。
4：筲箕灣選區係唯一民主派比較有利嘅地方，落選差距係 1% 左右。
5：民主派落選嘅選區嘅差距平均都有成 30%。
『南區』
1：都係建制派主導嘅選區，但係平均候選人嘅落選差距偏細，僅次於灣仔區 （建制 914：929 民主）。
2：要特別注意嘅係有兩個選區；華貴，華富南。因為落選差距係 0.18% 同 1.74%。非常之細。
3：利東一同利東二基本上可以話係民主派嘅選區，但係好容易變成攻擊對象。
4：海怡東如果兩個民主派候選人嘅票數加埋係足夠擊敗建制派 （建制 2100 : 2488 民主)。
5：整體南區平均候選人嘅落選差距係 20.72%。
「總結」
港島區整體建制派會佔每區嘅候選人嘅一半嘅名額。建制派同民主派嘅落選票數差距偏細，平均每個候選人大約相差100票。民主派係港島區佔25%議席，但係唔好忘記建制派有15席係自動當選。好明顯建制派有策略去調配人手參選，好少內訌情況出現。而今次民主派有好多地區都係有勝算，最少之後要重點攻陷落選差距低於5%嘅選區。最後就係啲無黨派嘅真係無人理佢哋，所以可以不理。
