「武器」
之前講過數據將會係未來唔同行業嘅最大武器，而傳統嘅營商模式係解決每日社會嘅問題。但係當一啲行業邁向數碼化嘅時候，互相競爭嘅再唔係最終購買嘅產品或者服務，而係用戶體驗同利用數據去制定營運模式。傳統營運模式好難去計算成本效益，好多時都係要估估下。舉例，買一個三十秒嘅電視廣告要幾多錢？有幾多人睇？睇完有幾多人會幫襯？究竟買完廣告嘅實質銷售回報有幾多？
「回報」
如果最終你買嘅產品或者使用嘅服務都係一樣嘅話，你會幫襯邊間公司呢？而點解會有唔同公司提供同一類型嘅服務？佢哋點樣賺錢？個原理其實好簡單，就係反思維。利用數據去推算所需嘅資金同指定策略。譬如話我要賺十蚊，咁需要幾多個人去幫襯你？如果要十個人，即係每個人要俾一蚊！咁究竟要幾多個人了解你公司嘅產品同服務先至會幫襯？如果只係得百分之一，咁即係十個人入面要有一個，如此類推！
「平衡」
逆向思維係一件好科學化嘅營運模式，而大部份傳統營商模式都未能接受嚟種模式。事關真係有少少好似炒股票咁，仲要係短炒嗰隻！不過就算係炒股票都係一樣，要短炒同長揸兩者兼備。當然要成功嘅話亦都需要配合唔同嘅投資產品，其實等同係唔同嘅媒體投放廣告，搵啱嘅人才做應該做嘅工作，投資同利用適當適當嘅技術。咁樣就可以取得平衡，否則大個依賴數據亦都未必可以幫你殺出一條血路！
