「賽車」
相信好多男仔都應該會鍾意賽車呢個運動，只不過係香港就真係好難可以接觸到。當然玩車嘅人好多，但係職業賽車手就好少，有好多都係業餘！係香港要接觸車呢件事其實已經好難，唔似得外國好多人好細個就已經有車牌，事關係生活嘅需要而且佢哋要日日揸，技術上面一定比好多香港人好。而要真正去賽車感受賽車運動，大部份人會去珠海或者肇慶參加賽道日。
「加油」
今年又有朋友出戰 「第六十二屆澳門格蘭披治大賽車」嘅「澳門路車挑戰賽」，不過又係無緣去到現場支持佢，唯有係屋企嘅電視機前面同佢打打氣。所以係度先預祝佢星期五嘅排位賽順順利利，而當然就梗係星期六當日可以做到好嘅成績，捧隻獎盃返黎！希望大家都可以支持我呢位朋友，記得留意「三十九號」嘅「方偉成」，佢會以豐田「86」再一次挑戰呢項賽事！
「澳門」
澳門嘅賽道出名難，好多路段都好窄，所以係好考車手嘅能力同技術。而且澳門東望洋賽道一向都以危險著名，所以過去舉辦過嘅賽事都曾經發生過多宗嚴重意外。另一個關鍵當然係架戰車嘅性能同臨場嘅設定，好多時都要靠試完車先至可以再調整。當然好想去現場去睇賽車，但係更加想去影相。希望來年有咁嘅機會去影相，用另一個方法去感受賽車運動。
Also published on Medium.
