「分享」
好多時都會有人無啦啦打電話嚟話有乜嘢講座想搵你做分享。尤其係年尾，好多講座同培訓課程，所以特別多咁嘅邀請。當然好多時我聽到啲人搵自己去分享數據分析有關嘅題材我都會有興趣，只不過年尾真係太多咁嘅邀請，但係有時一啲同數據無關嘅邀請就要諗下去唔去。事關做分享唔係問題，只不過真係邊有咁多時間去準備咁多嘢。當然你可以話用啲講過嘅題材，但係有時真係唔得。
「目的」
自己去做講者，去同人分享，其實目的好簡單。有啲人認為係免費宣傳同提高知名度，而事實上好多時大家以為係咁。不過都好睇你分享嘅內容同功力。反而對我嚟講，我只係希望多啲人了解同認識數據分析嚟個行業同重要性。只不過有時大家搵講者嘅時候要記住好多時人哋都係義務性質無收你錢，真係連時間同精神都要蝕埋俾你。所以有時好怕一啲人抱住奉旨嘅態度去搵你做講者。
「準備」
要做好一個講座，最困難嘅地方係控制時間！因為有啲講座得三十分鐘，有啲就成三個鐘。所以準備材料係要花啲時間同心機，真係無得馬虎。好多時都要諗過晒啲材料嘅鋪排，唔係一兩個鐘頭就可以搞得掂嘅嘢囉！最慘嘅就係好多人以為份材料係變出嚟，變完出嚟又話要改題目！當然改唔係問題但係點解唔一早講呢？所以依家如果唔係一啲識嘅朋友介紹，或者係一啲覺得值得去嘅講座之外，我通常都唔會義務去做。
