「光棍」
當然唔係個個知道乜嘢係「光棍節」，其實好簡單，我哋香港人所講嘅「光棍」咪就係無伴侶嘅男仔囉。不過「光棍」亦都係代表單身。而無啦啦點解十一月十一號叫做「光棍節」？又係一個好簡單嘅解釋，就係因為阿拉伯數字係四條一，好似四碌棍咁棟咗係度，所以「光棍節」就係咁誕生。不過有商家就將「光棍節」變成商業活動，自此十一月十一號就變咗一年一度嘅網絡購物節。
「網購」
你今日有無上網買嘢？話晒今日都係「光棍節」，相信好多人識得淘寶或者知道心儀嘅商戶會係今日推出「光棍節」優惠嘅人都會趁機會上網執平嘢。其實講到尾「光棍節」同美國嘅「網絡星期一」一樣都係希望透過網絡促銷而刺激消費者購物需求。所以都係搵個藉口將每年某個平凡嘅日子變成一個商戶推廣同促銷嘅藉口。不過其實今日唔單止係「光棍節」，因為對好多人來講係「一生一世，一心一意」嘅意思！
「歷史」
其實「光棍節」係二零零九年由淘寶帶頭將一個網絡嘅節日變成網購日。而上年嘅「光棍節」淘寶全日營業額達五百七十一億人民幣，而交易覆蓋二百一十七個國家同地區。全日網上訂單嘅交易額達到八百零五億元人民幣，包裹嘅數量達到四億個，而平均每張訂單嘅價值為一百九十七元人民幣。與此同時，接近三萬個品牌參加去年嘅活動。唔知今年又會有啲乜野驚人嘅驚人數字呢？
