「技倆」
唔知點解香港有啲公司話幫人註冊域名，搞網站，買廣告，但係佢哋堅持用佢哋自己公司嘅帳號幫人註冊同買不同嘅服務。唔通咁樣就可以威脅佢哋嘅客戶，以為咁就可以綁死啲客？唔好咁天真啦好唔好？如果真係做得好，其實點解要用咁嘅技倆。人哋都係唔識先至搵你做啫，但係都唔好咁無良，就算有日真係唔搵你哋做，至少都比返晒啲嘢人呀。就係因為咁，好多人都對我哋嘅行業無晒信心！
「無良」
過去幾年都會有唔識搞資訊科技嘅朋友同我講話佢哋個域名因為其他人或者公司幫佢哋買，之後因為服務差或者反咗面，結果公司個域名無咗，搞到一鑊粥。最慘就係冇咗域名，連公司個網站同電郵地址都要改，搞到啲客搵唔到佢哋，真係煩到爆。但係點解啲公司可以咁，話晒域名係人哋嘅公司資產，個擁有權係人哋公司而唔應個註冊嗰個。每次我都同我啲朋友講，所有公司資產最好自己保管好啲。
「緊記」
我只可以同身邊嘅朋友講，自己嘅嘢最好攞返個擁有權。依家嚟個年代，無嘢緊要得過一個域名。俾人拎咗嘅話真係喊都無謂，所以就算用多少少錢將其他差唔多嘅域名都買咗先，同埋真係唔好假手於人。就算唔識，最好都係搵個識搞又信得過嘅朋友教你或者係你面前攪。咁樣就係最穩陣！講真我真係好討厭啲人唔將啲域名交俾個擁有者。有時真係唔怪得啲人成日話俾人呃！
