「節目」
估唔到今晚「新聞透視」竟然講數據，而且用「數據年代」作為題材。而作為香港推動數據分析嘅其中一份子，嚟個題材當然好吸引。不過都係果句，唔好再用「大數據」好唔好？事實上數據係如何產生？當然係透過我哋每日所做嘅嘢而產生，而就算你係屋企唔出街都會有數據產生。數據唔係萬能，但係如果將數據運用係適當嘅地方，其實係可以優化好多我哋生活嘅問題！
「責任」
依家個個先嚟講數據，但係又有幾多人真係明白數據所隱藏嘅信息。好多人以為越多數據就越好？其實有時唔係多就代表有用。之前見到有人講「數據越多，責任越大」我真係十分之同意。因為好多數據含有好多個人資料，一個唔小心好容易外洩。所以大部份時間我哋都會避免收集太多個人資料，況且做數據分析係睇大趨勢，要咁多個人資料其實係無乜意思。
「私隱」
雖然越多個人資料係可以知道某個人嘅喜好，而且可以提供更有用嘅訊息俾客戶。不過每個人都會因為環境而改變，所以就算今日佢鍾意某樣嘢唔代表以後都一樣。如果要為咗投其所好，而過分收集數據，咁樣就等同入侵人哋嘅個人私隱。當然每個人都有責任去保護自己嘅個人資料，所以有時係雙向嘅。除咗企業要有盡佢哋嘅責任保護客戶嘅資料之外，大家都應該保護自己嘅個人資料。
