「百日」
以前我哋細個慶祝小朋友滿月，但係而家大家都改為慶祝同搞百日宴。因為好多人覺得初生嬰兒啱啱出世一個月就帶佢出街有啲危險，同時媽媽啱啱坐完月身體都仲未完全復原。所以大家都選擇擺百日宴就係因為咁嘅原因比較多，當然仲有好多人都會按照傳統擺滿月酒。時間過得真係好鬼快，個仔咁就出咗世三個幾月。而見到佢日日都開開心心對住我哋笑，真係外面發生乜嘢事都唔再重要！
「慶祝」
今晚係阿仔嘅百日宴，我哋選擇咗簡簡單單咁淨係同自己屋企人食一餐飯。而今日最開心嘅就係爺爺最終可以出院，趕得切一齊同曾孫慶祝！之前身體唔係咁好，一直係醫院。當然好擔心佢，同時亦唔知佢出唔出到院同我哋一齊慶祝。當然如果最後唔得都無辦法，佢嘅健康係最緊要。不過最後佢好叻，趕得切，因為好難得可以四代同堂一齊影張相，一齊食飯。希望阿仔同爺爺健健康康，快快樂樂！
「誇張」
依家啲人搞百日宴真係可以好誇張，好似搞到自己結婚咁誇張。有時係度諗係唔係又係一場大龍鳳？其實最緊要係乜？未就係一家人開開心心食餐飯囉！當然我老婆又再一次出手，整咗個佈景板，淘咗啲氣球同件衫俾個仔，當然唔少得生日蛋糕啦。因為到最後係我哋啲大人先知道發生緊乜嘢事，話就係小朋友嘅大日子，但係到最後最開心嘅咪又係我哋啲大人囉！一個三個月大嘅人仔點會知道同記得嚟啲嘢呢！
