「拍檔」
上個月先寫過洪永城，而今日寫黃翠如其實係因為一張之前佢哋係新加坡出席頒獎禮嘅時候兩個拖住手行紅地氈嘅相。雖然我唔係太過鍾意黃翠如，尤其做完之前無線嘅遊戲節目嘅主持同之後嘅「愛回家」。但係唔知點解佢同洪永城兩個擺埋一齊，件事變得好理所當然。雖然佢哋大家已經各自有咗佢哋嘅另一半，只不過係好多網民嘅心目中佢哋先至係一對。老實講佢哋係幾襯嘅！
「熱話」
網上面因為一張洪永城同黃翠如嘅拖手行紅地氈嘅相，引嚟一班網民連番洗版，由一篇《我諗每個男人心裏面都有一個黃翠如》到《其實，每個女仔心目中大概都會有個洪永城》直至黃翠如嘅神級回覆真係掀起滿城熱話。仲唔止咁，網民仲用咗「天生不對」嚟首歌同佢哋兩個之前拍嘅節目剪咗條片，真係睇到大家眼濕濕！點都好係度都祝福佢哋兩位啦，就算現實唔係一對，係螢幕上都可以嘅！
「文章」
《我諗每個男人心裏面都有一個黃翠如》
有啲男人頭，有啲亂黎，你同佢好好朋友，會一齊食飯，一齊宵夜，一齊去旅行，但係永遠唔會撻著。你同佢好似總係有啲莫名嘅共鳴，人哋永遠會以為你哋係一對，但你心裡面知道根本無可能，當朋友問到你通常都答：「唔，係有啲好感，但係當佢係朋友嚟㗎咋」。但係問心，你係有少少鍾意佢，但你亦知道佢係完全唔鍾意你。你哋都好享受呢種感覺，一種好似男女朋友咁親密，但係完全無男女朋友責任嘅感覺。直到一日黃翠如同蕭正楠喺埋一齊，你會發覺：「唉！原來我好鍾意黃翠如呢條八婆」但係好可惜你已經失去左一百次同黃翠如一齊嘅機會，你只好係成班朋友面前繼續同黃翠如扮好朋友。得閒串下佢，佢得閒又會串番下你 ，但係你兩個都知，其實有啲嘢係唔同咗。難得有一次工作上嘅機會，你可以再同黃翠如手拖手。。。隔咗一兩日，你睇番報紙，見到張相，你微笑，你流淚。
《其實，每個女仔心目中大概都會有個洪永城》
人越大越發現成班八婆一齊就好多是非，有時同男仔做朋友簡簡單單仲開心，於是你同佢開始變成特別好嘅兄弟，就好似《我可能不會愛你》嘅李大仁同程又青咁。兩個人出雙入對，到身邊嘅朋友都驚訝：「吓？乜你哋仲未一齊？」有一刻你諗過，你哋究竟仲係唔係普通朋友咁簡單，但見佢冇乜表示。有次傾起擇偶條件，佢嘅理想型同你差十萬九千里咁遠，「溫柔體貼、賢良淑德，最好就識煮嘢食」。你自問自己十分粗魯，煮嘢食喎，唔炸爛個廚房都偷笑。的確佢係對你特別好，但都係唔好諗咁多，人哋要追就一早追咗。洪永城知道咗你同蕭正楠一齊，一如以往地恥笑你：「終於有人要嗱？」不久之後，佢都有個唐詩詠，你個心有少少唔舒服。你開始明白一樣嘢，呢個人係你心目中，總係有一個特別嘅位置，唔能夠被任何人取代。你選擇停留於呢種關係，可能係因為習慣，亦可能係因為唔想失去、唔想受傷。情節嚟到呢度，《我可能不會愛你》嘅李大仁同程又青兜兜轉轉，發現其實自己鍾意對方，最後都係大團圓結局。不過咁戲劇化嘅野就只會喺韓劇、台劇發生，現實又有幾多對李大仁同程又青。有樣嘢比好朋友更加一去無回頭，叫兄弟幫。有人問咁樣算唔算收兵。哈，諗諗下其實佢都幾似你隻兵。但同時你自己都做緊佢隻兵，一句『喂今晚飲酒』，就隨傳隨到。呢個時候你會得啖笑，兄弟呢家嘢，你識條毛咩。
《黃翠如親自回覆全文》
每個人心裡面都有對黃翠如同洪永城，太平實普通，太易代入。有點嘈，有點吵，你哋好老友。一齊嗌交，一齊講心事，一齊去旅行，但係永遠唔會撻著。你哋好似總有啲無名的共鳴，人哋永遠以為你哋一對，但你哋心裡面知道無可能。當朋友甚至親人問起，黃翠如回答：「我鍾意陽光型運動型感性型開朗型活潑型總之不是洪永成個臭八公型」洪永城回答：「我鍾意陽光型運動型性感型開朗型活潑型總之不是黃翠如個臭八婆型」。你哋好享受呢種互相欺負的感覺，你哋更加習慣咗，大家手拖著手互相扶持行過紅地氈。然後有一天，洪永城說，他已經找到他的她，要鬆開手先上台。黃翠如有點感性，送上祝福。然後，黃翠如繼續一個人在紅地氈上走呀走，有一天，她跟洪永城說，她好像也找到了她的他。洪永城說：「乜自閉都會拍拖？」難得有一次工作上的機會 黃翠如同洪永城手拖手。。。隔咗一兩日，見到張相，心中比微笑和流淚更多。我們都很想用所有的心去祝福大家：走完紅地氈，台上的路，希望你/妳走得更加好。
《天生不對》
