「讀書」
讀書其實係為咗啲乜？如果你問我就係將人類過去嗰幾千年所學咗嘅嘢逐一咁傳授俾我哋嘅下一代。希望將來佢哋可以用我哋所學咗嘅嘢再更進一步，等佢哋唔需要再浪費時間同遇到無數次嘅失敗先至可以學到我哋依家擁有嘅知識。但係現今社會就會用學識嚟評價唔同人嘅能力，但係讀書考試其實個原意係乜嘢？我相信一定唔係因為要小朋友背書，而係透過書本得到知識再加上自我理解書本嘅內容。
「原因」
點解讀書變咗係一種壓力同評論一個人嘅能力與價值？讀書叻啲就代表聰明啲？讀書叻啲代表人生會開心啲？當然你可以話讀書叻嘅人，前途應該會好啲，搵錢能力會高啲，最起碼有多啲工作機會。但係事實係唔係咁？其實自己嘅經驗係相輔相承，當然現今社會要有工作表現先至有機會，如果唔係再高嘅學歷都無用。而當然有時候真係要拋下書包啦，因為好多時比人挑戰嘅時候都可以用學識嚟反擊。
「分數」
係外國其實好多時都係睇啲小朋友嘅理解能力多過背書能力，所以好多香港嘅學生去到外國讀書都會唔慣，因為香港大部份都係死記死背，而外國係好睇學生嘅理解能力。咁點解要有評分制度？好明顯就係等我哋容易啲去分別好與壞，但係都係要整體去睇分數。如果大部份學生攞到差唔多嘅分數同大家有好大嘅差距，咁當然睇法就唔同。不過有時係好睇俾分個位人士，因為唔係選擇題，所以無可能用同一個標準！
