「寵物」
係香港好多人都會養寵物，而大部份嘅人都會選擇養貓仔或者狗仔。但係好多時其實決定養寵物嘅時候都或者係一時衝動。而當你選擇要去養一隻寵物之前，其實你要清楚知道你係要照顧佢一生一世，唔係一時興起覺得佢好得意，好可憐就買佢返屋企。就算係養寵物，我唔建議去買，因為係寵物店買嘅大多數都係啲無良嘅人不斷要繁殖啲貓狗等佢哋可以賣比人去賺錢。所以就算係養，我都會領養！
「家貓」
近日我家大佬病咗，佢已經好多日無自己食嘢，每日我同老婆都好擔心佢嘅健康。雖然已經帶咗佢哋兩次醫生，但係仲未知道大佬發生咗乜嘢事。之前就算有事，佢好快都會自己去飲水同食嘢。依家每日我哋只可以幫佢打皮下水同強行餵佢食少少嘢。我真係好擔心，唔知點算好。平時活潑開朗，跳跳紮紮嘅大佬唔見咗。我希望佢自己可以肯主動去食嘢，因為繼續落去真係唔係辦法。
「責任」
雖然我同大佬嘅相處係從幾年前開始，但係佢已經成為我嘅生活同屋企嘅一部份。我真係希望佢可以快啲好返，雖然每次去睇獸醫找數嘅時候都會見到一張唔係你咁想見到嘅帳單，但係每日見到你淨係匿埋喺房唔出嚟食嘢，個心真係好唔舒服。有時我真係唔明點解香港有咁多被人遺棄嘅貓狗！唔通啲人冷血嘅？養寵物嘅責任係要照顧佢，唔係郁啲就話唔要佢，放棄佢。大佬，我哋一家人都希望你快啲好返架！
