「世界」
當然唔係個個人會睇無線嘅節目，但係有時真係係屋企無無聊聊都會開著個新聞台係咁播。如果大家有留意，本來係無綫新聞台播開嘅「世界零距離」無啦啦唔知點嘅會係無綫翡翠台十點半嘅時候播。當然佢最主要嘅內容就係去一啲我同你都未必去嘅地方。講真有啲地方都幾特別，唔講真偽唔知有嗰個地方存在。雖然唔係啲乜嘢大製作，只係一個新聞報導員主持嘅一個節目，不過就幾有趣。
「主持」
當然好多好嘅無綫新聞主播都已經離開咗無綫新聞部。或者你以前唔會留意「世界零距離」嘅個位新聞主播「方東昇」，但係而家我相信會多咗人識佢。其實都唔係第一次注意到佢嘅節目周不時都講一啲好爛嘅嘢，但係就係夠爛先至吸引到大家。我諗連佢都冇諗過會突然有咁多人去注意佢。講真有時佢講啲嘢真係唔知好嬲定好笑，因為無啦啦彈啲急口令出嚟，又經常玩食字，真係滴汗！
「另類」
其實由一個新聞主播到主持一個唔知算唔算係旅遊節目嘅節目，其實已經唔同以前無綫嘅製作。好多入面嘅資訊其實我覺得幾有趣，事關佢哋去嗰啲地方真係你一世人都未必會去嘅地方。全部都係山卡罅咁鬼遠，真係有錢都未必會選擇嘅地方。冷門嘅程度比起去南極更加冷，更加難。亦都因為「方東昇」而一個好似唔好笑嘅搞笑方法去主持個節目，反而效果重好個啲旅遊特輯！
