「第一」
人生有好多嘢都會係你嘅第一次，而有幾多第一次最令你深刻？第一次返學？第一次返工？第一次出糧？但係有啲嘢你真係希望淨係得一次，而有啲嘢你就希望可以重新嚟過。但係人生就係咁，好多時淨係得一次嘅機會，而如果錯過咗第一次嘅話，抑或第一次做錯咗，你真係會希望有第二次嘅機會。但係人生邊樹會咁完美，所以好多時只可以將每一件事睇成第一次。因為你未必咁好彩有兩次嘅機會！
「珍惜」
做咗人哋老竇，當然希望同個仔一齊去經歷佢每一個嘅第一次。無論大小事務都希望睇住佢成長，因為細路仔真係大得好快。雖然佢出咗世兩個月，但係睇返啲相佢已經變咗好多。而我同佢最深刻嘅第一次就當然係佢出世啦，第一次聽到佢喊，第一次見到佢，第一次剪臍帶，第一次做人老竇。好多好難忘嘅第一次！所以真係要懂得珍惜每一次嘅經歷，因為個仔淨係只會出世一次同長大一次，真係無得補番數㗎！
「老婆」
當然講完好多同個仔嘅第一次，咁就梗係講我同老婆嘅好多第一次。唔洗講就當然第一次認識，第一次出街，第一次拍拖，第一次去旅行，等等。數都數唔晒！而我當然希望同老婆有更多屬於我哋嘅第一次啦，雖然唔係次次都係開心嘢但係只要係兩公婆一齊嘅第一次就已經足夠，因為全部都係我哋兩個嘅回憶。不過我自己多數都淨係記住開心嗰啲第一次，因為唔開心嘅記嚟仲乜鬼嘢呢？
