「文字」
由細到大係香港返學讀書寫字都係用英文同中文，而中文就當然係以繁體為主！而講真有啲繁體字係比較複雜，筆劃又多，但係中文字本身係像形文字，所以繁體字係由簡單圖案慢慢演變到今時今日嘅中文字。而其實每個字都係有好多意思係後面，所以唔可以咁輕易就話要用簡體字去取替。講真我真係唔明，因為有時啲簡體字真係無咗原本個意思，估都估唔到原本個繁體字係乜。
「繁簡」
如果我仲係中國做嘢，我見到簡體字嘅嘢我覺得冇問題，因為我身處中國。但係如果係香港，我哋係用繁體，無啦啦用乜鬼簡體？係唔係又要中國化？點解要用繁體字？因為繁體字先至有本來個字嘅意思。正所謂中文博大精深，而其中一個原因就係一個字代表咗好多嘢。「親不見，愛無心，產不生，廠空空，麵無麥，運無車，導無道，兒無首，飛單翼，湧無力，有雲無雨，開關無門，鄉里無郎，聖不能聽也不能說，買成鈎刀下有人頭，輪成人下有匕首，進不是越來越佳而往井裏走，只有魔，還是魔。」
「文化」
每一種語言係代表一個種族嘅文化，而好多時我真係唔明點解中國要用簡體字。當然我記以前係中國做嘢嘅時候問過，好似係因為太多筆劃同寫嘅時候太嘥時間。而其實點解有簡體字係因為想解決文盲嘅情況。但係講真，起初去大連做嘢嘅時候，有啲簡體字真係估佢唔到，係要啲時間去習慣下。到咗而家其實係中國仲有好多人無得返學，無得讀書，有無簡體字都唔一定可以解決文盲嘅問題
