「咖啡」
如果大家仲記得好幾個月前我曾經講述一宗香港公司係網上集資，而且勇奪「香港資訊及通訊科技獎－全年大獎」嘅智能咖啡機。點解又再講？事關過去咁多個月佢哋嘅創辦人一直話如果十月出唔到貨就會退錢俾之前曾經俾咗錢支持佢哋生產部咖啡機嘅人。但係到咗十月啦，部機仲未見到影，而家仲要話如果要退款，你只可能退得部分嘅錢，事關你嘅錢有部份已經用咗。
「騙案」
我諗今年最大嘅騙案一定唔係嗰啲電話騙案，因為至少佢擺明呃你錢，但係至於部智能咖啡機就用盡所有唔合理嘅邏輯同原因去遮掩佢哋嘅騙案。當然有一班苦主亦用盡一切辦法去退款，但係好多至今仍未成功。當你睇到佢話你只可以退回部份嘅錢，仲話因為要對佢哋其他嘅支持者負責任，咁不如話你已經用咗啲錢去風流快活，而你會有可能淨係退返一蚊雞。真係有病！
「苦主」
當然有一班苦主係鍥而不捨咁要佢哋退返晒所有錢，事關佢哋支持嘅咖啡機其實根本無存在過。講乜嘢已經買咗幾多部去全世界，乜嘢因為保密協議，又話申請專利，又話改個設計，等等。一大堆廢話連編！呃錢就呃錢啦，重要個集資平台唔會付任何責任，搞到大家要向信用卡公司去投訴先至有機會拎返啲錢。佢哋真係以為啲人好易呃，點知班苦主死咬唔放，仲話要搵「科技罪案調查科」，真係唔係講笑！
