「中國」
雖然香港已經回歸咗咁多年，如果你話冇變過就真係呃你嘅！所謂五十年不變，真係有啲呃細路仔嘅感覺！而香港人大部份都好現實，只要有錢搵，唔好影響自己嘅生活就冇問題。如果經濟差嘅話，就係度怨天尤人，之後就話要搵阿爺幫手。而過去咁多年好多人其實淨係搵緊中國錢，但係就忽略咗同犧牲咗好多香港原本嘅特色。咁仲唔係中國化？有時諗返自己係中國做嘢嗰幾年，適應咗當地生活都覺得自己被同化咗！
「國慶」
自從香港回歸之後，每年十月一日都變成公眾假期。而每年因為國慶所以自此就除咗農曆新年之外都會係維港放煙花！當然我諗大家關心嘅係唔係國慶嚟件事，而係有冇假放。但係而家每年嘅國慶，我只會記得南丫海難。其實真係唔需要不斷用唔同方式去話俾香港人聽我哋已經回歸咗，年年勞師動眾搞乜乜乜慶祝國慶。如果係為自己國家同民族自豪嘅話，真係冇需要搞咁多大龍鳳囉！
「香港」
係香港嚟個地方，我哋香港人係唔會忘記我哋嚟個身份。因為我哋會為自己係香港人而自豪。正如北京人，上海人，四川人，等等都會為自己係果度嘅人已自豪一樣。而香港當然慢慢中國化啦，你入去名店唔講普通話你睇下點？一定唔想服務你。有時啲人無啦啦同你講普通話，我以為自己返咗大陸。至於去行啲旺區，我真係以為我自己返咗內地。事關連行都行唔到，四周圍唔係講廣東話而係普通話。咁仲唔夠中國化？
