「人生」
人生好多時都唔會十全十美，想一得二根本無可能。大部份時間做嘅決定，就算當初好似有好多選擇，但係到最後其實都係二選其一。咁點樣揀先啱？真係無人可以話你知。所以凡事無兩全其美，只可以按當時嘅情況去作最啱嘅選擇。有時亦會遇到一啲進退兩難嘅局面，真係點揀都死。唯一可以做嘅就係就算死，睇下點樣死會死得無咁慘。人越大就越多嚟啲煩惱，都係做細路好！
「兩難」
經常會討論一個問題，就係雞先定蛋先嘅問題。真係各有各說法，邊個先至啱？唔知！而做人就係咁，好多時都會被逼去到兩難嘅情況。而如果你係一個圓滑嘅人，應該會比較輕易解決人事上嘅問題。至於你話生活其他嘅兩難真係數之不盡，而創業其實會經常遇到。所以就算之後睇返自己嘅選擇，千祈唔好諗點解當日做咗嗰個決定。因為你只會不斷抱怨，不斷鑽牛角尖！
「現實」
我當然有好多兩難，譬如話打工定創業，屋企定公司，請人定外判，等等。相信大家都有可能處於兩難嘅局面，但係只要自己覺得做得啱揀得啱就得，唔好俾藉口自己後悔。雖然好多時會諗如果揀另一條路，選擇另一個決定，咁今日又會點？正所謂有早知無乞兒，鬼知咩！所以想樣樣嘢都可以順順利利，十全十美？真係難過登天！最緊要係對得住自己咪得囉！
