「寫文」
老實講我啲中文真係唔叻，你估都估唔到我其實係用谷歌瀏覽器嘅廣東話輸入法嚟寫文。因為我真係唔識速成或者倉頡，而當然我知係會寫得快啲。不過對於我嚟講得小六中文水平嘅人，一日寫一篇全中文嘅文，唯一可以幫我嘅真係廣東輸入法。事關係以英文嚟拼返個音出嚟，所以對我嚟講真係花節方便。如果叫我手寫嘅話，真係分分鐘唔記得個字點寫，同埋寫到天黑都未寫完！
「自己」
其實自己寫文係純粹係為自己定一個目標，就係堅持。我個人其實真係經常開咗個頭，無咗個尾。所以今次係非常堅持。所以有時真係忙到無停手，但係都希望繼續每日寫一篇發洩下。當然寫寫下就會有人搵你寫嘢，但係我真係唔敢寫咁多。唔係唔想試，只不過覺得如果做得唔好，倒不如唔好做。仲有我經常寫錯字，有時寫完睇咗一次睇唔到，之後睇返又搵到啲錯別字！
「今後」
雖然目的唔係要好多人睇，因為當初開始寫文都唔係為咗嚟個目的。所以只係希望繼續堅持日日寫下嘢，記錄自己個日想記錄嘅嘢。講到尾，有時真係覺得有少少變咗本日記。而家有時睇番幾個月前寫嘅嘢都真係幾得意，不過有啲就好明顯係冇乜時間寫，快快寫完就算。寫文真係可以反映到當日嘅心情，而依家日日寫幾百字，我哋中文水平希望有進步啦。多謝收睇！
