「中秋」
每年就嚟到中秋節，好多人都會買月餅。而依家啲月餅真係五花八門！除咗傳統嘅月餅，依家有冰皮月餅，雪糕月餅，奶皇月餅，流心月餅等等。不過最記得嘅就係細細個，每年到咗中秋節嘅時侯都好想食月餅，尤其係啲蓮蓉。因為甜嘢嘛！係細路都鍾意食甜嘢架啦。不過都係到咗大個先知識得欣賞啲蛋黃，尤其係起晒油嗰啲。無論係點，每年都希望至少買盒傳統月餅返屋企過節！
「月餅」
唔知幾時月餅變到如此奢侈，如此畫蛇添足。年年個個都話要訂邊間邊間出嘅月餅。但係有時真係有啲貴得離譜，真係值咩？好唔好食，值唔值嚟樣嘢就真係見仁見智。我自己就比較傳統，都係鍾意食返蛋黃蓮蓉月餅，事關真係唔太識欣賞啲冰皮月餅，仲要有時出埋晒啲奇奇怪怪嘅味道。老實講真係好似無咗原本月餅個種風味，好多都係得個樣！
「奢侈」
有時唔知係唔係真係羊群心理，人哋話好食，好難買，個個就走去癲埋一份。有時心諗，一個月餅可以有幾好食？唔通食咗會飛？成日話好難買，其實或多或少係唔係推廣策略呢？其實我都有試過唔同款式嘅月餅，如果你要我特登走去買，我或者唔會。當然各花入各眼，好唔好食真係自己先知。傳統啲都係咁話，我都係會走去買盒榮華雙黃白蓮蓉返屋企。咁先似返中秋節㗎嘛！
