「電訊」
相信每個香港人都會有至少一個手機號碼，而我用咗而家個電話號碼同電訊商十幾年。由以前公司電話，個個月幾千蚊到成萬幾蚊電話費到而家自己每個月俾幾百蚊，點都算係一個長期嘅客戶。但係而家啲電訊商嘅服務質素就每況越下，次次都要打電話上台鬧一餐。最好笑嘅係我合約到期，問佢我有乜嘢選擇，點知講埋晒啲廢話，我要嘅係你話俾我知我作為一個客戶你點幫到我，而唔係照住張傳單讀囉！
「煩惱」
又係到咗手機合約到期嘅時候，又係一個超級煩惱嘅問題。當然而家無咗無限上網嘅套餐，但係啲收費真係貴得離譜！服務差唔在講，而家仲要越收越貴。俾多啲錢唔係問題，不過同地鐵一樣，選擇真係少之又少，而且服務質素又唔見得好咗好多。但係都係個句，可以轉得去邊間呢？到其時轉完仲差又係攞嚟搞。所以到呢刻都仲未知去或留，因為對而家嗰間越嚟越失望！
「服務」
雖然明白公平使用條例，亦明白而家係要靠數據服務先至有錢賺，但係條數點計都貴咗好鬼多。我一部電話，一部平板電腦，而家四百蚊無限，但係新服務就要比多百幾蚊仲要兩邊分。好啦問你有乜選擇，竟然同我講要出兩個號碼，加埋要近成千蚊先有無限。你真係有無病呀？其實係唔係出隻蛋，日日帶出街先至最划算呢，不過就真係超麻煩囉！唉，唔知可以點，完全擒住嚟搶！
