「足球」
我諗好多係香港長大嘅男仔都會鍾意踢波，而我其實細個都好鍾意，不過我自己就真係好少睇波，除咗世界盃之外。至於邊個位置我最鍾意？當然係門將啦，或者係因為「足球小將」入面「三杉淳」嘅原因，我鍾意守龍門多過做前鋒。不過人大咗，唔記得邊個話踢波唔會高之後，所以係中學時期就越嚟越少接觸足球。不過見到香港近年係足球賽事有所進步，希望真係有機會去打世界盃啦！
「事實」
首先唔好插我，我只係公平啲咁講幾句。當然香港隊逼和中國隊我都好開心，因為我都係一個香港人嘛！不過場比賽就真係險過剃頭！點解？原因係好彩香港隊打多幾個，佢哋就係龍門嗰兩條柱同條橫眉，如果唔係應該入咗波好耐！好明顯幸運女神係企係香港隊嚟邊。當然值得一讚嘅就梗係門將葉鴻輝啦，有好幾球真係救得唔錯，所以就算有幸運女神，都要香港隊頂得住先得㗎！
「比賽」
當然比賽嘅嘢就緊係有輸有贏㗎啦，更何況波係圓嘅，邊可以話輸打贏要？就算贏唔到比賽，都唔應該無品！講真香港隊真係輸人唔輸陣，全部專注防守，你攻唔入係你問題，可以怪得邊個呢？況且唔係無機會被你入，只不過你入唔到啫。所以講到尾，香港隊唔係淨係靠運氣，都要有實力先至可以頂到九十分鐘。最重要嘅係香港隊同中國隊係有一定嘅距離，射唔入可以怪邊個？
