「方向」
為免自己唔記得，所以寫低先。事關唔好比藉口自己無啦啦有變陣。講真現時香港仲未去到各行各業都重視數據分析，而且仲係一個好早期嘅階段。雖然已經奮鬥咗五年，只可以話自己未做得好好。不過有樣嘢係一定要改變，就係坊間對我公司嘅誤解！因為我間公司唔係廣告或者策略公司，而係諮詢服務公司！同時唔係淨係分析數碼數據，而係任何數據都可以。
「改變」
香港暫時做數據分析方面，好多都仲停留係網上同手機上嘅數據，而且大部份都係同市場推廣有關。甚少本地公司會投資大量資源去了解客戶行為同公司營運效益。點解？因為大部份公司都係好短線，而數據分析係要慢慢先至見效。同時因為回報期比較長，所以唔會貿貿然投資落去，況且人才少，人工貴。變陣係在所難免，不過變嚟變去都係離唔開數據！
「目標」
今年花咗好多時間去諗下一步應該點做，所以定下之後目標。第一當然係令市場知道公司定位，第二係要擴闊數據分析範圍包括開放同傳統數據，第三係做專業培訓令更多人了解數據分析嘅價值同培訓更多人才，最後利用過去嘅經驗去開發自己公司嘅數據模型俾更多人可以使用。當然聽起上嚟好似有啲妙想天開，不過再坐以待斃唔係一個辦法。
