「危機」
好多時我都同人講我未死得，但係點解會咁講？其實好簡單，因為仲食得瞓得，仲生存緊。至少未至於要瞓街，所以已經好好。但係另一個原因係因為要自己不斷處於危機狀態，咁當然創業同守業係經常處於嚟個狀態入面，而保持危機意識先可以不斷向前行同面對不同嘅競爭對手。當然有時有自己會混淆乜嘢先係現實，因為咁樣係好容易精神錯亂。一唔小心其實自己已經死咗！
「生存」
要創業，好多時係為咗生存，事關就算你係打工皇帝又點？你亦都有機會被人炒魷魚！所以其實打工又好，創業又好，其實咪又係一樣。只要唔死得未得囉！有時太安於現狀，反而危機就不知不覺係你身邊。所以就算你幾成功，搵幾多錢都好，永遠都應該有應變措施，作最壞嘅打算。因為今日唔知聽日事，做好兩手準備，一日唔死得就有翻身嘅機會！
「自己」
係現實社會你當然可以不斷去同人哋比較，但係好多時比上不足比下有餘。凡事只要做好自己，識得感恩同珍惜，咁就算你未死得，其實已經比起好多人已經好好。至少你仲可以過自己想要嘅生活，做自己想做嘅嘢。所以今日我仲生活係嚟個世界同有一個好好嘅家庭，做到自己鍾意做嘅嘢，真係已經好滿足。當然可以更好，不過仲未死得就即係仲有機會啦！
