中文名

「改名」

前個排先至搞掂個仔個英文名,但係我同老婆一直仲未改好郭家大少個中文名,原因係想等師傅睇完佢個時辰八字之後先至睇吓乜嘢字先至啱佢。而較早前我哋已經將一啲我哋鍾意嘅字俾師傅睇,但係好多都唔啱個仔用。之後師傅亦俾咗啲字我哋揀,但係唔係淨係玩五行咁簡單,重要睇下嗰兩個字嘅筆劃同掛象。搞咗成個禮拜,最後得返幾個我哋鍾意嘅音同字。

「中文」

今日係郭家大少出世嘅第二十八日,而我同老婆終於決定到個仔叫咩嘢名。幫自己個仔改名係一件好辛苦嘅事,事關嚟個名會跟住郭大少一世,正所謂唔怕生壞命,最怕改錯名!所以改名嚟家嘢真係唔可以求求其其。要改個好名,我哋幾經辛苦就晒佢個八字,五行,掛像,仲要個名好聽,有意思,夠響亮,真係人都癲。好啦,係時候開估啦,佢個名就係叫做「晞暘」!

「意思」

點解佢叫做「晞暘」?當然有意思㗎啦!唔通淨係叫落順口咩?首先點解用個「晞」字?「晞」係指日出之前,太陽即將升起嘅時候!咁點解用「暘」字呢?其實我同老婆都鍾意「揚」嚟個字,但係因為嚟個字同佢五行唔夾,所以搵咗一個同音字,而且「暘」係指日出,太陽升起嘅時候!所以整個名係描述日出嘅過程,代表每一日都係新嘅一日同新嘅開始,而且亦標誌著晴朗一日!希望「晞暘」每日都過得開開心心,快快樂樂!


Also published on Medium.