「飲茶」
我其實係一個都幾鍾意飲茶嘅人，當然我唔係去到好講究嗰啲啦，事關嗰啲真係有錢人玩意，分分鐘仲變態過飲紅酒。有時我都覺得自己奇怪，因為只要有支茶擺係我附近，我相信一定飲得快過你擺一支普通水係我側邊。當然下下飲茶未必好，因為有啲人話茶係取代唔到水，但係自己就好怕啲無味嘅嘢，尤其係煲過之後嘅熟水。如果係礦泉水，蒸餾水甚至乎有氣嘅水我都仲可以，但係一定無飲得咁快！
「津路」
唔知有幾多人同我一樣，飲烏龍茶淨係飲「津路」。唔知係唔係飲慣咗，始終覺得「津路」係好飲啲。而家一日最少飲一支大嘅烏龍茶，唔通飲烏龍茶係會上癮嘅？以前做嘢就成鬼日飲可樂，但係返到嚟香港好似選擇多咗，而且覺得可樂開始有啲甜，所以慢慢開始飲茶。就算「道地」有「玄米茶」，「十八茶」，「解茶」，甚至乎「烏龍茶」等等，始終都好似無「津路」嘅烏龍茶咁好飲。或者係心理作用啦！
「效能」
每日飲一公升嘅烏龍茶，就能夠有效抑制膽固醇，促進基礎代謝同熱量消耗，有助於釋放壓力！烏龍茶不但好處多，而且凍熱都得。烏龍茶能夠提升自律神經，副交感神經嘅活動，能預防因壓力過大造成嘅暴飲暴食，如此同時助減肥。日本科學家曾經對水，綠茶同烏龍茶進行提升基礎代謝功能嘅測試，結果發現水並無特殊功效，而烏龍茶能提高新陳代謝嘅能力，仲要係綠茶嘅兩倍添。咁你今日飲左未？
