「電車」
由細到大因為我住係港島區，所以電車對我嚟講係一個非常有意義同回憶嘅交通工具。仲記得細細個我哋都會叫啲電車做「叮叮」因為嚟個名係源於電車開車或警示所用嘅鈴聲嚟提醒路上面嘅行人。而電車係香港嚟個城市嘅一大特色，如果你話香港再無電車嘅話，我覺得呢個就再唔係我哋嘅香港！每個城市係應該有自己嘅特色，如果無咗嘅話仲有咩野特別呢？
「顧問」
真係唔知邊個咁低能，竟然建議全面取消電車呢個交通工具。香港人多車多，最大問題嘅係啲巴士，小巴同的士。輪都未輪到電車啦！將一個又一個香港嘅特色逐一摧毀，香港再唔喺香港，係唔係經濟重要過文化同特色？有經濟冇文化，冇歷史，咁係乜嘢嘅社會呢？電車唔單止係童年回憶，仲係香港其中一個好重要嘅歷史同文化嘅標記。點可以隨隨便便就話取代佢？有無腦㗎？
「回憶」
以前細個好鍾意坐電車，因為你可以慢慢欣賞香港大部分地區嘅特色，由屈地街一直坐到去筲箕灣，雖然要花一段時間，但係沿路嘅風土人情，我相信係嚟個世界無一個地方可以見到同感受到。而有時搭電車係一種態度，因為可以等你喺一個咁急速嘅城市入面，好自然咁慢落嚟。雖然係慢啲同舊啲，但係有啲嘢唔一定用經濟效益嚟到考慮佢存在嘅意義。而電車就係其中一種！
