「三人」
唔經唔覺郭大少聽日就已經出咗世三個星期，而咁啱聽日亦都係老婆嘅生日。自此之後每年嘅生日就由二人行變成三人行。雖然三個星期好似好耐咁，但係時間就過得好快。郭大少一日一日咁長大，而家個樣同出世嘅時候已經好唔同。雖然佢唔係好似有啲嬰兒咁成個米芝蓮咁嘅樣，但係佢就手長腳長同慢慢越嚟越有肉。希望佢快啲大，咁就可以同我哋一齊出街街啦！
「屋企」
大家有睇開我嘅文章，應該都知道我屋企仲有兩隻貓。而大哥真係好乖，由老婆去醫院唔係屋企幾日，到郭大少返屋企，佢知道我哋要照顧細佬，所以都無乜話要嗲我哋。而佢都好勇敢去接近細佬，不過郭大少就因為俾大佬啲貓鬚嚇一嚇唔小心揮咗個左勾拳俾大佬嘆。而大佬亦都比佢嚇一嚇，成個彈起咗。不過我相信大佬係好錫細佬，事關好多時都係房到陪佢！
「改變」
當然屋企嘅改變仲要一啲時間去適應佢。而家當然屋企行先，所以如果個仔同老婆要去覆診，我都希望盡量同佢哋去。當然我好享受湊仔啦，不過而家仲有陪月姨姨幫手，但係之後要同老婆湊仔就要重新適應啦。今晚老婆先同我講，我哋有好多戲都仲未睇，睇怕都要一段時間先可以同老婆拍吓拖，二人世界。因為嚟緊仲有排忙，而最急切嘅就當然係仲未改中文名啦！
