「人生」
大部份嘅人都會都會窮一生嘅精力去追求主流社會所謂嘅價值同觀念，而當有人逆水行舟，背道而馳嘅時候都會被世俗人嘅眼光所鄙視。但係人生嘅意義係乜嘢呢？正如佛家有句話「萬般帶不走，唯有業隨身」就係指人係生命死結束之後，係乜嘢都帶唔走！不論你幾努力打拼一生嘅成事業，財富，再美好嘅家庭，你都係帶唔走！唯一跟著你嘅，就係自己曾經造過嘅業！
「香港」
追名逐利，好似係現今香港社會嘅價值觀，人比人係好正常嘅事，而且越嚟越年青化！而每個人都處於一個壓逼嘅環境生活。就算比你做到好似李嘉誠咁又點？好多嘢真係兩腳一伸就化為烏有。當然大家係為咗好啲嘅生活而奮鬥一生，但係人生就係有起有跌，懂得知足常樂，懂得珍惜先至係人生。當然見到人哋成功嘅時候而自己好似一無是處，但係再諗返活在當下，享受人生先係最緊要。
「曾經」
老實講，曾幾何時我或者都係啲咁嘅人。當然我未至於不擇手段，恃勢凌人，囂張自大。不過當你未夠三十歲，而係短短幾年之間快速成長，個個老細都重用你，俾好多機會你，同時有二三百人嘅團隊，好似有自己嘅王國。但係當你離開公司之後，今時今日仲有幾多人會記得你？你過去嘅努力除咗給予你一份新嘅工作同機遇之外，到最後你都係要重新奮鬥！所以其實現實中都有好多嘢係帶唔走！隨緣啦！
