「一週」
唔經唔覺個仔話咁快就出咗世一個星期，而家諗返真係好似發咗場夢咁。由入院到出院到係屋企呢幾日真係忙到頭都大，雖然老婆之前已經搵咗陪月姨姨嚟幫手，但係真係忙過不停，不過相信過咗出世頭嚟幾個月應該會好啲。而家嘅分工就當然係我守夜啦，等老婆可以瞓多啲休息一下！而阿仔就今日返健康院檢查，而啲黃膽素都唔係話太高，希望過咗今日之後就會好啲啦。
「湊仔」
相信我身邊唔會有太多爸爸可以日夜係屋企幫手湊仔，事關香港嘅侍產假得個幾日。當然自己搞公司嗰班爸爸就另計啦。我諗如果得我老婆自己一個湊嘅話必定發晒脾氣同抑鬱。事關你一日嘅行程係瞓覺一兩個鐘就起身，之後食嘢，餵奶，泵奶，換片，執嘢，沖涼，洗衫，洗奶樽，洗碗，吸塵等等。而當你以為搞點晒所有嘢，安頓好嘅時候，你又再一次重複又重複咁做返同一樣嘢。
「樂趣」
雖然以前做嘢都好習慣好夜先瞓好早起身，但係最少你會連續咁瞓，而唔係每兩個鐘起一次身。就算打工，好多時你都可以星期六日瞓晏啲。但係湊仔就無呢支歌仔唱啦。不過話雖如此，見到自己個仔一日一日長大係唔同啲。最少我清楚佢嘅起居飮食同習慣。而呢個小朋友講真比我見過嘅已經好好湊。因為佢除咗肚餓，同要換片，一般都好少喊。喊都係有嘢唔舒服。所以托賴托賴同希望之後都係咁，我哋就舒服得多喇！
