「入院」
今晚老婆終於入院準備聽朝醫生捉郭大少出嚟。當然知道老婆擔心好多嘢，希望佢今晚可以放鬆啲，唔好諗太多嘢，開開心心咁迎接我哋嘅結晶品出世。雖然過去幾日仲諗緊開刀定順產。但係最後老婆選擇開刀，而我知道佢有少少唔開心，因為係最後一刻覺得心理壓力好大。無論係開刀定順產，其實已經好叻架啦。懷胎十月唔係一件易事。辛苦晒！
「期待」
今晚應該會瞓唔著，因為怕聽朝唔知醒起身。事關一早要起身去迎接嚟位大少出世，希望聽日一切順順利利！去到最後一刻都唔知係興奮定緊張，亦知道老婆其實同我一樣。雖然好似已經有十個月準備，但係第一次做人父母始終都係緊張啲。唔知個仔出世個樣係唔係同之前照超聲波個樣一樣嘅呢？有時諗下呢樣果樣都不失係一件好事，分散下注意力。
「加油」
最後喺度記錄低郭大少係出世前一日嘅每一刻。唔知佢大個睇返佢老竇寫嘅嘢會係點。我相信會好好笑！或者自己好多年後睇返都笑番自己。喺度為老婆同郭大少加加油，聽日快啲出嚟同大家見面。以後就唔駛隔住老婆個肚皮同你講嘢，但係同時又掛住你係肚仔入面郁嚟郁去。最最最重要係你健健康康，咁我哋就唔使咁擔心啦！
