「有病」
相信大家呢兩日都留意到「中華基督教會基真小學」小五女生係校內墮樓嘅死因研訊。而係昨日，死因庭裁定「羅芍淇」嘅死因存疑。我諗無人會質疑嚟個裁決，事關如果你有睇嚟單案件嘅來龍去脈，真係匪夷所思。作為辦學者，為人師表，點解可以「一派胡言」？真係擘大眼講大話，唔通佢唔怕夜晚發惡夢？真係非常認同裁判官高偉雄所講「完全唔見為人師表應有嘅態度，同對學生嘅關心」！
「痴線」
點解有個細路墮樓可以處理得咁兒戲？點都係一條人命！唔通學校嘅聲譽比起一個小學生嘅性命更緊要？而啲口供先至離譜！一個墮樓嘅人點會無事仲可以行得？咩嘢叫做學生要離開班房，你無辦法，管唔到？仲要賴個細路食咗咳藥水而令到神智不清，所以一個身高得一點四米嘅人可以越過一個一點三米高嘅圍欄而墮樓？係唔係痴咗線呀你哋？仲有點解第一時間唔係打九九九報警而搵「聖約翰救傷隊」呢？
「謎團」
嚟班所謂嘅副校長，訓導主任，老師同職員，真係離晒大普！我諗大家都好似我咁，會有一大堆疑團。一個人墮樓竟然會好似瞓咗？梗係瞓咗喺度啦，冇晒知覺就梗係瞓係度啦，唔通企係到咩？如果唔係自殺，咁點樣先可以跨過個圍欄？除咗俾人係後面推或者俾人掟落樓，我真係諗唔到其他原因。另外邊個會諗到小朋友最安全嘅地方竟然發生啲咁嘅事。而老師係有責任去管理同教育我哋嘅下一代。但係香港而家嘅辦學者竟然出現啲咁嘅人同事，咁仲點信得過比自己仔女係香港讀書呀？
