「倒數」
唔經唔覺已經嚟到第三十六週，郭大少仲有唔夠一個月就出世。之前嗰段日子好似過得好快，但係呢幾個星期又變得好慢。大部份嘅嘢都應該準備好，屋企真係迫滿晒佢啲嘢。老婆同我都經常覺得佢急不及待咁想早啲出嚟，而我哋每日都隔住個肚皮同佢講等多陣先啦，唔駛咁心急出嚟㗎，係個肚入面住多陣先啦！唔知佢聽唔聽得明，但係不厭其煩日日同佢講！
「心情」
其實上過星期先講緊仲有一個月就出世，但係過咗一個星期又不知不覺想寫下自己嘅心情。如果我同你講我唔緊張就真係假嘅，其實我好多時係故意係件事未發生之前令自己輕鬆啲。睇落唔係好緊張，其實就好緊張。呢個係我處理緊張心情嘅方法，而最主要係唔想因為緊張嘅心情打亂自己其他嘢。而慢慢，好多嘢就變得好平常。船到橋頭自然直嘛，有時緊張都無用！
「緊張」
咁耐以嚟去醫生度照超聲波，而又清楚見到郭大少個樣係得一次咁大把。我同老婆都好想知道佢個樣會係點，而且我哋都打算等醫生係三十八週做檢查嘅時候先決定開刀定順產。所以好多未知之數，咁你話緊唔緊張？同時真係唔知幾時有突發嘅嘢出現。就算擇好時辰揀開刀但係佢要做出嚟都冇計，所以話唔輪到你唔緊張。尤其係當好多嘢都不如人意嘅時候！真係會怯㗎！
