「回歸」
唔經唔覺香港已經回歸咗十八年！所謂嘅五十年不變係唔係真係無變過？如果你問我，我會同你講變咗好多！就算只係返咗嚟好幾年，但係已經感受到個變化。雖然話自己都係內地生活過五年，但係香港始終係香港，係應該有自己獨特之處。香港原本有嘅優勢慢慢流失，而一個健全嘅社會係應該有多元化嘅發展。不過回歸之後就樣樣嘢都一步一步倒退。
「政制」
香港雖然經過咗上年嘅「雨傘運動」，而早前亦已經否決咗「政改方案」，但係香港嘅將來會係點？唯一可以做嘅就係團結！就算呢一刻大家仲未爭取到「普選」但係千祈唔好放棄，只要堅持終會有一日就一定會成功！官字兩個口，佢哋講乜都得。千祈唔好比佢哋轉移視線，因為仲有好多唔同嘅事都要大家同心合力去為我哋嘅家為我哋嘅下一代去爭取！
「遊行」
當然好多人話點解今日仲有「七一遊行」，原因好簡單，呢個就當然係為香港繼續爭取「真。普選」！而且除咗政制發展之外，政府仲有好多嘢都仲未處理好。「香人治港」，呢個唔係淨係一個口號掛係嘴邊咁簡單。乜嘢係「一國兩制」？乜嘢係「五十年不變」？依家過咗一半都冇就已經變成咁嘅樣。試問香港將來會變成點？如果唔想香港變成一個平平無奇嘅城市，就要作出改變！
