「廣告」
其實做咗數據分析咁耐都會發現好多公司會或多或少都有係搜尋器到落廣告。而好多係透過廣告公司幫手落廣告，原因係佢哋唔識同無人手。當然有啲公司係可信任佢哋，但係就無好好睇下個成效，淨係一味揼錢落去。所以就算有啲中小企係咁買廣告就一直睇唔到成效，就好似詐騙案咁，俾人呃晒啲錢。而市面上係有好多技術嚟欺騙點擊率嚟收取回報。所以真係要監控買賣嘅情況！
「問題」
當然有時未必係廣告公司嘅問題，但係大家就應該要清楚知道啲錢用左去邊，究竟買咗啲乜。個個月由幾百蚊到幾千蚊甚至去到幾萬蚊都見過，而我哋做分析其實係需要知道每一個關鍵字需要用幾多錢同佢實際嘅經濟效益。往往我哋遇到嘅一個問題係廣告公司唔會俾嚟啲數據我哋，令到我哋同客戶都無辦法知道實質每個關鍵字用咗幾多錢。
「詐騙」
雖然係網上面落廣告係平啲同方便啲，但係就因為咁好容易被人欺騙。原因係好多客戶都唔知道實質購買廣告嘅價錢，除非客戶自己本身建立帳戶後再交給廣告公司負責管理廣告。咁樣客戶就可以監控投資情況，而唔係單靠廣告公司嘅報告。同時我哋做分析嘅時候都要求廣告公司提供關鍵字嘅價格，但係好多時都被拒絕。真係唔明有乜嘢要收收埋埋，除非佢哋欺騙客戶啦！
