「擺款」
今日我一位員工分享咗一篇「跟惡老闆有好下場」嘅文章。我相信好多打工仔都會遇過，慶幸嘅係我諗返我其實好好彩，因為認真咁同大家講「我未遇過」！我覺得好多人以為似住自己係老闆或者老細就可以擺下老細款。咁先至威威㗎嘛！當然有啲睇你唔順眼，針對你，為難你嘅就另計啦。不過我就唔鍾意或者係唔識擺款，原因係我都係打工仔一名！
「老細」
當然係打工仔眼中或多或少都會希望有個好老細，但係一個好老細除咗做好自己之外，我覺得就係培養出更好嘅人才。所以就算以前我嘅團隊有幾大都好，我都會同佢哋講，我都係打份工嘅啫，同你哋無分別。我覺得好嘅老細係不單只俾機會你咁簡單，仲要係側邊提醒你，更正你，係環境容許嘅情況下俾你從錯誤中學習。而我以前好多成功嘅老細都唔會擺款，所以反而受人尊重！
「創業」
好多人都會話因為唔想受老細氣或者老細唔好所以唔想打工去做老細，自此就可以佢哋鬧人而唔係俾人鬧。但係，作為一間公司嘅創辦人，不論係拍檔或者員工都係好重要。要搵到好人才，唔單止係緣份，仲要懂得點樣培養同挽留人才。雖然話以前打工都管理過幾百人嘅團隊，但係我都仲學緊點樣可以做好啲。只係覺得舊嘅管理模式係現今社會未必行得通，有時都要與時並進。
