「創業」
香港講真唔知係唔係一個好嘅創業地方，但係如果用嚟測試市場就無可厚非係一個好地方。原因好簡單，由成立一間公司至中西文化嘅交匯處都令好多人覺得係一個唔錯嘅選擇。但係論科技資訊人才，或者非常革新嘅概念就或者要諗諗。尤其做數據分析，要開發一個新產品，真係未必搵到人。至於市場方面，相對其他地方落後同比較細。
「開發」
係五六年前，香港真係冇乜人關心數據分析，甚至乎可以話無呢類嘅工作。所以其實真係可以話由零開始咁開發個市場。當然我只係唔叻同未試過，因為當初覺得做數據分析諮詢嘅服務係有一定嘅市場。而五年之後嘅今日，你話個市場有冇大咗，其實係有，只不過真係好細。有時會問自己重要幾耐先見到曙光。人嘅意志真係有限，何況關乎自己嘅日常生活。
「定位」
好多人都會問我而家做嘅嘢會唔會好窄好專，事實就真係有少少，但係亦係故意。依家嘅定位唔會做多做少，亦唔會影響其他合作夥伴。而最緊要係靈活變通同幫到客戶解決佢哋嘅問題。當然要搵到合適嘅客戶首先佢哋要了解數據嘅價值同認同我哋嘅能力。現今嘅環境，好多客戶唔係唔想利用數據，而係無時間分析數據。所以我係想首先解決核心問題：「人力資源」上面！
