「聲明」
唔好意思！今日我有感而發！首先講明我嚟編文係我呢一刻嘅個人感受！不喜勿入！你要睇我阻止唔到，我亦不會評論！請大家用自己嘅角度去思考下。首先我越來越覺得我哋呢班香港人係唔係有啲自視過高而忘記咗自己嘅身份？因為我開始頂唔順某一部份嘅香港人，唔係淨係講邊個年代，而係講整體！由道理變歪理都見怪不怪，過份偏激同矯枉過正先係大問題！
「起底」
不論啱與錯，大家係用自己嘅角度去評論每日發生嘅人和事。有時我覺得起某啲人嘅底係有必要，原因係可以等大家都知道嗰啲為非作歹嘅人係乜水同埋佢哋嘅惡行！但係，有時真係要去起人底嗎？究竟個界線係邊？係唔係睇你唔順眼就要起人底？禍不及妻兒，有時有需要起人哋三代嗎？嚟啲咁嘅思想，行為同價值觀真係要吹捧嗎？我真係覺得做香港人就係預咗做啱抑或錯都係會有機會比人鬧！
「狹窄」
好多時我覺得香港人嘅心胸同視野都好狹窄，小小事都可以鬧一餐，投訴一餐！當然有時我都會，但係都要睇下個情況，唔係下下得個鬧字！但係有時啲白痴同自私嘅行為真係唔鬧又唔得。個個都抱住打工嘅心態去工作，所以就懶懶閒，根本呢個先係核心嘅問題。香港人成日話冇機會，係其實係唔係自己嘅問題呢？下下都想一步登天，賺好多好多錢咁又點？唔好淨係去台灣，日本同韓國嚟啲地方啦！放眼世界好唔好？
