「執屋」
間屋真執嚟執去都執唔完，阿仔仲有個半月就出世，唯有繼續努力。其實已經係咁揼嘢，但係無計而家住緊嗰度係租嘅，而啲收納位同間隔唔係好實用。本來諗住可以捱多陣，但係真係要睇定地方搬，而家唯有盡量空多啲地方出嚟放阿仔啲嘢。但係當佢再大啲嘅時候就真係要多啲空間俾佢走動！咁個陣時就唔係執屋，係執嘢走人！
「洗衫」
果然古語有云，洗衫先嚟落雨。諗住晏晝有啲太陽，咋咋臨開洗衣機洗阿仔啲衫等佢出世用。點知洗緊嘅時候陽光普照，洗完就陰晒天仲好似有啲雨。唉，無計！唔洗都洗咗，唯有照晾住啲衫仔先啦。不過第一次洗啲咁細件嘅衫仔真係有少少奇怪，因為真係好細件。凡事都有第一次，今次知道邊啲易晾，邊啲難晾，咁下次知點處理。
「清潔」
執屋就梗係順手抹埋嘢同吸埋塵。都唔知點解香港咁多塵，同埋唔知點解有咁多衣魚。嗰啲一隻隻嘅嘢真係好鬼煩！不過最緊要就係唔好有小強！如果唔係屋企又會發生星球大戰！但係今日好鬼黑仔，整早餐就切親手指，之後開微波爐又撞親手踭，最後諗住抺窗又無啦啦刮到手指。點都好啦，得閒清潔下屋企，乾淨啲，人都精神啲！
