「歪理」
近排越嚟越聽得多一啲以為自己講緊道理嘅歪理。係呢個世界變咗？定係我哋老咗唔明依家個世界嘅人諗乜？點解有啲人覺得自己講嘅嘢係大道理，仲要聲大夾惡，以為自己好啱，但係其實係一大堆歪理！真係抓爆頭，點解啲後生可以咁理直氣壯講一啲好似好啱嘅理論？定係價值觀唔同咗？有時聽到真係覺得好好笑，同時真係想鬧爆佢哋！
「真事」
話說我經常幫襯屋企附近嘅生果檔，咁一如以往去買生果。去到嘅時候見到兩男兩女同老闆研究緊一個切咗嘅水晶梨。聽咗陣之後原來嗰幾個人話佢哋買咗啲水晶梨係爛嘅，所以同老闆理論。其實個水晶梨係熟咗啲，而唔係爛。當然老闆為咗息事寧人，就換俾佢哋。但係個問題係，有啲水果睇外表係唔知佢係爛，就算係，關個老闆咩嘢事呢？
「橫蠻」
睇見個幾個人真係想幫個老闆鬧佢！你去買生果，返到屋企切開之後發現爛咗，咁咪揼咗佢囉！有乜咁大不了？係咁話個老闆賣啲爛生果俾你，真係火都嚟。大部份時間你去買生果都係自己揀。所以其實係唔係你自己揀咗個爛嘅生果呢？真係好似你去買六合彩，馬會一定包你中頭獎咁！香港人幾時變得咁橫蠻無理㗎？真係生意難做，小小嘢就大吵大鬧！
