「豬腳」
其實真係唔知點解生完小朋友要派薑醋同食薑醋。淨係記得要派薑醋嚟個傳統，應該係好意頭掛。薑醋嘅材料當然包括薑同甜醋，之後就有蛋同豬腳，所以亦都稱為豬腳薑。但係好似係網上面就好似搵唔到點解要煲薑醋，淨係話產婦係坐月期間要休養生息，同補充流失養份。所以就要食薑醋嚟以滋補強身。
「效用」
係網上面終於搵到講薑醋嘅效用，據稱食薑醋嘅原因係因為生薑可以幫助袪風散寒、活血去瘀、幫助子宮收縮，而豬腳就含有大量嘅鈣質。用醋煮豬腳最主要係要將佢軟化，咁食用嘅時候就會比較容易吸收。另外雞蛋含有八種人體必需嘅氨基酸，礦物質同維他命等多種成分，所以點解產婦要食薑醋補身。
「煲醋」
今日老婆大佬親自操刀上嚟幫我哋煲薑醋。一個大砂煲，幾大樽醋，大大盒薑，煲佢一頭半個月到郭大少出世咁就有得食啦！數數下，郭大少仲有六十日就面世。時間真係日過得好快，開始倒數，但係好似仲有好多嘢未搞掂，慢慢開始有啲緊張，同時亦都期待屋企嚟個新成員。
