「講座」
每次去啲講「大數據」嘅講座，都有同一個感覺。就係「吹水」多個講實例。第一本人最憎「大數據」嚟幾隻字，我之前都講過數據無分大小。有用嘅數據先至係最重要。好多公司都話想用數據但係就無從入手，個原因係唔知係邊到開始，同唔知個回報係啲乜。所以次次啲講座都無實例，下下講你有幾多數據，分析幾多嘢又如何？聽落覺得好勁，但係最後都係聽到「一嚿雲」！
「表面」
個個講者都講「大數據」可以幫到公司點點點，但係就講一啲好表面嘅嘢。聽得最多嘅就係香港俾其他國家落後，個原因係乜？好簡單，一間企業睇嘅係回報同經濟效益。但係偏偏數據要有回報，其實要配合好多嘢。就算你係數據入面搵到啲有用嘅嘢，但係其他人唔配合，唔改變咁又點會成功？講就當然容易，做係幾難嘅一件事！大家都唔分享同講實例咁大家又點知會有乜嘢回報呢？
「投資」
其實好多公司第一件事係搵工具嚟試圖用數據，而當時希望好快有回報，但係如果你冇一個數據分析師幫手係無用。所以公司第一件事就係投資係人才，而唔係技術。而一般要係數據入面搵到有用嘅數據係需要三至六個月。同時唔好貪心，用少少數據去試下睇下有無得著。因為八成時間係整理數據，而兩成先係分析。而分析嘅時候九成九係反映實況，同制定基準。所以要搵有用嘅數據係需要時間！
