「煮嘢」
其實平時都間唔中都會落下煮，但係大多數時間都係煮西餐多。唔知點解次次一煮中餐老婆都話我唔識煮。咁又好似係，我都覺自己煮中餐係麻麻地。所以郭家大宅有個不文明嘅規定就係我負責煮西餐，老婆煮中餐。不過係屋企煮嘢當然最緊要係享受煮嘅過程，同食嗰個食得開心。但係，最唔開心嘅就當然係事後嘅清潔工作。
「驚奇」
好多朋友係 Facebook 或者 Instagram 上面見到我啲煮嘅嘢食相，佢哋有啲嘅反應係乜我識煮嘢嘅咩？咁個答案就梗係我係識得煮啦，只不過係冇乜煮過畀啲朋友食啫。屋企又唔係大，坐多幾個人都唔得，所以好少係屋企宴客。不過希望大家唔好俾啲相呃咗，因為有時我係會失手，甚至我自己都覺得難食。所以有時唔好淨係睇個賣相。
「菜單」
咁通常會煮啲乜？最多嘅係煎牛扒，整薯蓉同意粉。不過老婆好似鍾意食白酒忌廉藍青口，香草燒羊鞍，明太子忌廉意粉，鮮蕃茄濃湯，三文魚他他，瑞士雞翼等等。不過有時都會試啲新嘢，例如法式薄餅，西多士，燒春雞，馬蹄冬菇肉餅。當然呢個菜單仲係有啲小，要認真慢慢一樣樣咁學，希望遲啲可以煮啲更加複雜嘅嘢，不過要個廚房大啲先得！
