「質量」
我好多時都會講，重質不重量！原因係如果要做嘅話就應該要做好佢。我一直都對內同外講，我哋嘅分析係重質，因為簡單一個報告有幾難做？如果馬馬虎虎了事，咁客戶有乜需要搵我哋去做？如果幫唔到個客我都唔好意思收佢哋啲錢。有時啲客會話我哋收得貴，但係如果你為咗一份有質素嘅分析報告的話，我咁講我哋一啲都唔貴。
「口碑」
之前我都講過，我唔係為做而做所以開間公司。公司係有一個好明確嘅核心價值同處事方針，務求做好一樣嘢，就係數據分析。講真我哋好少甚至乎唔賣廣告，所以口碑好緊要。尤其係香港，個行業太細，做衰咗個名就真係搵人睬你都有味。所以質量對我嚟講係非常重要，而每次當內部做完啲分析同報告之後我都會問一句，我哋有乜嘢結論同建議俾個客，如果無咁我哋嘅價值係邊？
「執著」
好可能係好多時睇唔過眼同抵唔住頸，有時真係唔明有啲公司可以剪剪貼貼就做一份報告。講真好多時真係覺得佢哋當啲客係傻，個報告完全係可以直接揼落垃圾桶！所以我非常執著個報告易唔易睇得明，講重點唔好嘥時間，有無深入分析而作出可行同有建設性嘅建議。如果做唔到嚟三點，咁做嚟仲乜？浪費自己同個客嘅時間。所以報告長唔代表有用，最緊要係講重點！
