「經驗」
前幾日睇到身邊嘅朋友分享打工同創業嘅分別，所以自己又寫吓自己嘅睇法同感受。從打工到創業再返去打工到再一次創業，不經不覺已經十七年。時間過得好快，自己都覺得自己老了。不過乜嘢叫適合？創業定打工，其實我覺得唔輪到你揀。生活環境會改變你嘅決定。當然，社會富裕咗，環境好咗，個個都話創業，令創業變成一種年輕人嘅虛榮。
「打工」
人要打工最主要嘅原因係為咗生活，而大部分嘅人希望有穩定嘅收入同相信穩定先至可以「安居樂業」。所以就算你份工幾稗微，其實大家都係為咗兩餐飯仔！當然打工嘅工作時間就真係要睇吓你份工啦，而除非你追求升職加薪，一般打工仔都淨係會做自己份內事，因為多做多錯，少做少錯呀嘛！同埋放咗工就係放工，你唔需要再諗公司嘢！乾手淨腳！
「創業」
如果你因為唔想打工而創業，咁你失敗嘅機率會好高！因為你無假放，無返工同放工，一日二十四小時都係做緊嘢，無穩定嘅收入，手停口停。要創業除咗乜都要識之外，仲要執其他人嘅手尾。如果你怕辛苦，接受唔到失敗，咁你亦都唔識合創業。做老闆唔係大晒，因為你嘅責任唔淨止係你自己，仲有跟住你搵食嘅員工。仲有無人會知你會唔會成功，因為只有你先知！
