「平凡」
其實有時做人點解唔可以平凡啲？平凡有啲乜唔好？以前初出茅廬就會諗點可以有份好工，有個好老闆，快啲升職加薪，同不斷提升生活質素。但係嚟啲淨係用「金錢」同「職位」嚟衡量自己同用嚟比較其他人嘅指標根本就膚淺。我唔係未試過嚟啲生活，只不過就覺得越來越冇意義。因為好多時個人處於高壓狀態，淨係不斷行前衝，其實真係開心咩？
「社會」
當然同人哋講自己打乜嘢工，做乜嘢位，搵幾多，住係邊，等等嘅嘢都係想話俾人知你唔係流嘅。有啲人會覺得咁樣好勁，但係正所謂一山還有一山高，講咁多咪又係打份工，都係有機會俾人炒！有時人睇你好，你睇人好，試問有幾多人真係了解自己？真係五隻手指數得晒！所以比呢樣比嗰樣咁又點？有錢冇錢，有名無名又點？所有嘅嘢都係過眼雲煙！
「平淡」
之前睇咗一個前輩分享嘅廣告，睇完之後就覺得係呢個香港，要過一個「平淡生活」一啲都唔容易！但係事在人為，我只係想過一啲無憂嘅生活，做自己鍾意做嘅野，同老婆開開心心過每一日，等個仔出世之後可以睇住佢健健康康成長。當然「平淡」唔一定「平凡」，而「平凡」係一種態度，唔係可以用名或利去衡量。正所謂「平凡是福」！
