「節日」
今日係母親節，係度希望各位媽媽母親節快樂！當然今日成日都俾人洗版，不過唔緊要，因為各位媽媽都好開心一家大細出去慶祝。我諗每個媽媽最開心嘅就係睇住自己嘅仔女出世，長大，結婚，生仔！雖然我唔會十月懷胎，但係睇住郭大少係郭靚太個肚一日一日咁長大，真係覺得好辛苦同偉大！呢啲係做男人永遠唔會感受到嘅嘢！
「升級」
今年係我老婆由靚太升級變咗做靚媽嘅一年。雖然郭大少今日係第二十八周，仲要最少十周先同我哋見面。但係可以話係佢同我哋過嘅第一個母親節。希望佢安安全全出世，唔好日日係肚入面打功夫，大咗之後好好孝順媽媽啦！當然作為人哋嘅老公又點會唔買啲嘢慰勞吓老婆呀？除咗陀住郭大少咁辛苦之外之後出世仲有排受！
「嫲嫲」
今日當然要到同屋企人去飲茶啦。而主角就梗係各位媽媽，最最最緊要嘅就係我嫲嫲啦！佢除咗要湊大我阿爸同兩個姑姐之外，佢仲要幫手湊大我哋。所以我最錫嘅係我嫲嫲，而佢最開心應該係我做老竇，因為佢好快就多個曾孫啦。希望嫲嫲健健康康睇住個曾孫成長，咁第時就多個人錫佢啦。
