「創業」
仲好記得第一次創業係十八十九歲，當時因為冇入到心儀嘅大學科目。讀四科真係肥三科，所以覺得繼續讀落去都無乜意思。正因當時科網熾熱，加上自己有少少設計同寫網站嘅興趣，所以就開咗間做網站設計嘅公司。Mania Design 係我第一間公司。但係慢慢就知道工作經驗唔夠，同個陣時邊到有乜嘢創業活動。所以做咗一兩年就摺咗。
「打工」
當知道自己嘅經驗唔夠，所以就開始打工。當然做過大大小小嘅公司，而第一間公司就正正係「陳豪」大佬係澳洲開嘅一間設計公司。講真係佢教識我好多嘢，飲咖啡亦都係同佢做嘢嘅時候開始。之後離開咗就去咗另一間跨國公司係推廣部門做設計師。但因為自己識得做網站，後來就變咗做網站設計，重操故業。不過亦因為科網爆破，公司裁員，最後好好彩去咗 IBM 開始我嘅企業生涯。
「經驗」
對好多人嚟講，佢哋好唔習慣大企業嘅作業流程，不過或者我做耐咗已經好習慣，我又覺得冇乜嘢。係 IBM 初期，自己係一個小小員工，每日做嘅就係更新網頁內容。不過之後頂唔順佢哋，不斷諗點樣做好啲同快啲，慢慢機會多咗，就得到認同。直至去到中國大連，開始培訓同帶領新嘅團隊。由小小十幾人到五年後二百五十人，呢個經驗真係好好！因為對今日在創業係相當有用。
