「保險」
講到買保險，我真係一竅不通。當然除咗汽車保險會買之外（因為法例規定一定要買第三者保險），我從來無買過其他類型嘅保險。因為好多時打工，公司都有醫療同人壽保險，所以自己再買一份就覺得好似無乜用。可能後生覺得無啦啦洗舊錢又無病無痛，買嚟把鬼咩！嘥錢！但係你一過三十歲就知道你嘅身體大不如前同自己無再打工，下下睇醫生都要係自己扲荷包嘅時候就會諗係唔係要買返份呢？
「醫療」
上星期，老婆突然講咗句話要同個仔買醫療保險。跟住就諗，係喎我真係無諗過要買醫療，淨係諗過買儲蓄基金比個仔。所以又上網研究呢樣嗰樣，但係買保險有係一件超多細節同條款嘅嘢！分分鐘仲多過我同個客簽果張合約。所以要逐隻逐隻字去睇，因為真係好多細到你睇唔到嘅字，而嚟啲通常就係被陰到嘅地方。你以為份保單保咩，點知就偏偏個樣唔保！
「種類」
先唔好講多，淨係一個醫療保險都搞到你陀陀擰！首先唔好講內容，淨係搵邊間保險公司都已經頭都大埋。上網做完一啲研究，好似得「保柏」有網上保價。其他都好似要約啲保險經紀出嚟傾。但係唔問清楚真係唔得，因為有啲嘢嚟個計劃包，有啲又唔包。有啲又話要睇金額，當然越俾得多就保你多啲嘢啦。點都好，睇怕係要俾啲保險經紀煩一排先得！好在有啲朋友介紹相熟嘅經紀，希望無咁煩啦！
