「特首」
我相信大部份嘅香港市民係唔明白個特首係點選出嚟。今次林鄭月娥又再一次被人擺上枱，基本上香港人只可以係預設嘅情況下選特首。個所謂政改基本上係一套屈機嘅機制！因為基本上選舉個機制無改過，只係象徵式咁好似好民主咁俾所謂嘅投票權我哋嚟班香港人。但係個事實係，好似射十二碼咁「一係入，一係唔入」嚟兩個結果。仲要個龍門唔係用標準嘅大細！問你死咪!
「選舉」
個政府成日叫我哋「袋住先」，究竟點解我哋要「袋住先」？打個比喻，有個人無啦啦俾啲嘢你叫你幫佢「袋住先」，但係你唔知道入面係乜，點知原來係毒品。你咁啱又俾差佬捉到，斷正，仲要坐埋監！咁當初點解你會「袋住先」呢？如果之前係得兩至三個人俾一千二百人揀，依家又係得兩至三個人俾全香港揀，但係問題係無一個你想揀嘅話，咁仲係唔係一個「選舉」呢？
「投票」
好啦話就話係「一人一票選特首」，「有票，真係唔要？」。大佬呀，個問題係最後你精挑細選嗰一千二百人揀兩至三個人俾我哋「投票」呢！我只可以揀「甲，乙，丙」，但係三個都係壞人，咁即係無得揀啦！要我同流合污啫？咁我哋係唔係應該先投票揀嗰一千二百個所謂嘅題名委員會呢？點嘅得「入同唔入」呢？我其實想投俾「阿丁」囉！咁叫「有票，真係唔要？」喎。。。
